Greint hefur verið frá því að helstu framleiðendur minniseininga í tölvur, suður Kórensku fyrirtækin Samsung og SK Hynix og Bandaríska Micron Technology, hafi ákveðið að draga úr framboði inn á neytendamarkað. Þess í stað muni þeir einbeita sér svo til eingöngu á framleiðslu og sölu á minniseiningum, svokölluðum HBM (High Bandwidth memory) og DRAM (dynamc random access memory) í netþjóna. Kaupendur eru fjöldi gagnavera sem eru í byggingu fyrir gervigreind. Samkvæmt yfirlýsingu frá Micron Technology þótti ákvörðunin að hætta á neytendamarkaði, erfið.
Sérstaklega er um að ræða verkefnið OpenAI Stargate, en talið er að þegar fram í sækir verði þörf á um 900.000 DRAM minniseiningum á mánuði í verkefnið, sem er um 40% af heildar framleiðslugetunni. Vegna frétta um minnkandi framboð á neytendamarkað hafa fjöldi fyrirtækja og einstaklinga hamstrað birgðir af minniseiningum sem hefur gert það að verkum að minniseiningar hafa hækkað verulega í verði, eða rúmlega tvöfaldast frá því snemma árs 2025. Sem dæmi má nefna að 32GB DDR4/DDR5 minniseiningar hafa hækkað frá $120 og kosta nú á bilinu $350 til $400 og allt upp í $600 þar sem verðið er hæst. Mesta hækkunin varð frá nóvember 2025 til byrjunar janúar í ár. Þessi hækkun nær einnig til annarra hluta tölva eins og harðra diska (HDD og SSD), sem mikil spurn er eftir og er talið að hækkunin nemi um 50% eða meira. Viðbúið er að skortur verði á minniseiningum og hörðum diskum og ekki er gert ráð fyrir því að framleiðendur nái að anna eftirspurn fyrr en eftir eitt til tvö ár, eða í lok árs 2028. Þessar sviftingar gera það að verkum að tölvur sem seldar verða síðari hluta þessa árs koma til með að hafa minna innra minni og harðra diska en hafa verið til þessa. Setur þetta almenna neytendur, kaupendur tölvubúnaðar nú í dag, í vanda og spáð er hruni í sölu nýrra tölva og eldri tölvur fá nýtt líf í staðinn fyrir að enda í landfyllingu.
Talið er að gervigreind komi til með að vaxa mikið í náinni framtíð og krefst hún gífurlega mikils tölvubúnaðar. OpenAI Stargate verkefnið á að mæta þeirri eftirspurn. Er um að ræða risa verkefni, eitt það stærsta í sögunni í uppbyggingu gagnavera og á það sér fá dæmi, slíkt er það að vöxtum. Ráðast á í stórfellda uppbyggingu á gagnaverum sem hýsa eiga háþróaðar tölvur, eingöngu fyrir gervigreind. Talið er að þegar upp verði staðið þá komi gagnaverin til með að afkasta um 10 gígawatta reiknigetu sem krefst gríðarlegs magns af tölvum og orku. Fjárfestingin er metin á allt að um 500 milljarða bandaríkjadala.
Verkefnið er alþjóðlegt samstarfsverkefni stórra fyrirtækja undir forystu OpenAI, sem er að mestu í eigu Microsoft. Sem dæmi má nefna japanska fjárfestingafyrirtækið SoftBank, bandaríska hátæknifyrirtækið Oracle og fjárfestingarfyrirtækið MGX frá Sameinuðu Arabísku Furstadæmunum. Til að byrja með verður byggt gagnaver í Texas í Bandaríkjunum en þegar fram í sækir er gert ráð fyrir uppbyggingu gagnavera, sem miða að því að uppfylla framtíð gervigreindar með sérstaka áherslu á reiknigetu, á heimsvísu.
Eins og málin standa um þessar mundir í tölvuheiminum þá birtist kapítalisminn í sinni skýrustu mynd; eftirspurn er meiri en framboðið og verð hækkar. En þessi ákvörðun framleiðenda minniseininga hefur vakið upp spurningar því um er að ræða sölu á gríðalegum fjölda sem ekki hefur enn verið framleiddur, sem setja á í tölvur sem hafa ekki heldur verið framleiddar. Tölvurnar fara í gagnaver sem ekki hafa verið reist, sem knúin verða af rafmagni sem ekki er til, til að fullnægja eftirspurn sem ekki er til. Allt er þetta batterí sett af stað vegna ímyndaðs hagnaðar; peninga sem ekki eru til. Talið er að þetta dæmi sé stærðfræðilegur ómöguleiki.
